Bezoekers site

  • 8785Totaal aantal bezoekers:
  • 9Bezoekers vandaag:

Bleumke van d’n daag

Dees waek is de hónderdste daag van ’t jaor: 10 april.
Det is de bèste daag óm te zeije, veural van vlas.
Wie hoger men ’t zaod opgeuëjt, wie hoger ’t gewas zal greuje.
Went de zeijer eine gouwe rink dreug zou ’t zaod extra good opgaon.
Veur det men begint mit zeije maak men zich ein kruutsteiken en zaet:
”God zien mach geit baove den duvel zien krach.”

Ein zaodzaegengebed veur terf wo hosties van waere gemaak:
“Deze terf dae zeij ich neet
Veur mösje vènke of anger gevieë
Mer waal veur Jezuke klein
Dae lieët ’t greuje fijn’. 

 

 

8 februari 2017

Vastelaovesbleumke : “Dao sjtuk de bessem (of de wösj) oet” 

Tot aan ’t begin van de 20e ieëuw wore aan ’t hawte van ein cafe gein wètte verbónje.  Jederein koos wie zich det veurkoom ein tapperie beginne. Zoa koom ’t det men in jeder dörp waal versjeije beerhoezer koos vènje. 
In de keuke of in de gooj kamer drónk men dao ziene pint of zien dröpke, dao wórt gekaart en alle nuuts oet de naobersjap wórt aan de vaan gehange. Mit de kirmes en mit vastelaovend goof ’t gemeinlik mieë cafés es op anger tieje. Óm ’t publiek bekènd te gaeve det ein of angere gelaegenheidskroeg te bezeuke woor, koos men ein gans sumpele reclame. De kastelein sjtook eine bessemsjtek aan de veurgevel mit eine wösj sjtreuë d’r aan. ‘t Gezègkde: “Dao hunk de wösj oet” goof aan det dao beer te kriege woor.

 

25 januari 2017

Plaoge van Egypte

Veurige waek keek ich nao eine quiz op de TV. Ein vraog woor: Neum minstens drie plaoge van Egypte. Geine van de kandidate koom tot ein good antjwoord. Neet te geluive! De plaoge van Egypte zeen volges ’t Biebelbook Exodus de tieën rampe die God in Egypte zou höbbe gebrach, ómdet de Farao ’t volk neet leet vertrèkke oet Egypte. Volges ein sjoalversje (waal in ’t Nederlands) kènt men ze good ónthawte en ouch nog in de gooj volgorde:

Bloed en kikker
Mug en pikker
Pest en puist
Hagel druist
Sprinkhaan dikke duisternis
Dood die ’t eerstgeboren is.

Water verangert in blood (Exodus 7:14-25), kwakkerte (8:1-15), luus (8:16-19), sjtaekvlege (8:20-32), vieëpes (9:1-7), zjwaere (9:8-12), hagel (9:13-35), sjprènkhane (10:4 – 10:5), duusternis (10:21-29), doad van de ieësgebaorene (11:10 en 12:29-30).

 

4 januari 2017

De dómme dikke Driekus deeg d’n dulle duvel danse
Door dik, door dun, door distels, door däör,
Deeg d’n dikke dómme Driekus d’n dulle duvel danse.

(Versje om de duvel te verjage.)

De veer rouknachte det wore de nachte veur St. Thomas, 21 december, de kersnach, de nach
van nuujjaor en de nach van drie keuninge. Det wore de bèste nachte óm de duvel te verdrieve.
De duvel is de aanveurder van de wilje jach. Geiste en demone raosde róndj in de duusterste
tied van ’t jaor. Mit ein vuurpan wo op roukkruje loge, ging men, soms mit hulp van eine
geistelikke, door ’t beheksde hoes of sjtal.
‘t “Oetruike “van ziekekamers is nog lang bekènd.

 

19 december 2016

Waat is vraemp?

Veur ein toe deur sjtaon op de aope daag van ein gesjlaote inrichting.
Eine blènje dae te deep in ’t glaeske haet gekeke.
Eine sjerpsjötter dae taege zien vrouw zaet: “Sjat, ich höb dich gemis.”
Eine cardioloog dae zaet: “Hie klop get neet.”
Taege eine liliputter zègke: ”Ich hawt dich op de heuëgte.”
Eine voetballer zónger doel in zien laeve.
Eine vogel dae in de nèster zit.
Eine bamibal oet de Chinese moer haole.
Luuj oet Litouwe Lee Towers neume.
Aan de wiesvrouw vraoge of häör werk kènt bevalle.

 

 

25 oktober 2016

Wae twieë haes jeug dao kump niks aan oet.
Eine kleine haas sjpróng oet ’t kroed
Eine groate haas sjpróng dem veuroet
De jaeger koom tot ein besjloet
Hae wól ze allebei in de boet
Mer..zónger get koom hae ’t veldj weer oet.

Wae twieë haze tegeliek jeug vunk niks
( niet te veel hooi op de vork willen nemen)

 

 

29 september 2016

 

Eine toen van drie jaor
Eine hóndj van drie tuun
Ein paerd van drie hunj
En eine miensj van drie paerd
Zeen allemaol neet väöl mieë waerd.

Eine “toen” is de aafzètting róndj ein wei, meistes van meidäöre. Woor ein aope plaats in de hègk den moos dao “getuund” waere.
Flinke tek mit witsje (wilgentenen) die aanein gebónje wórte. Zoa eine toen woor nao drie jaor versjlete.

Eine hóndj van drie tuun woor 9 jaor.

Ein paerd van drie hunj woor 27 jaor.

En eine miensj van drie paerd woor 81 jaor.

 

 

Wae bótter op de kop haet mót neet in de zón gaon sjtaon.
(Wae get oetgevreate haet, of get fout gedaon haet, mót det angere neet verwiete).

Hae haet bótter op de kop.
(hae verwit angere waat hae zelf fout duit).

Wae eine kop van bótter haet mót geine bekker waere.
Men meint det dit te make haet mit ’t gebroek det men waar op de kop droog in eine platte bak. Nog lang bekènd bie de mooswiever van Mesjtreech. Det wore vrouwluuj die hun eige waar van de boerehaof nao de maert droge en zoa hun eige geldj verdeende.Zoa kan men letterlik bótter op de kop höbbe. Ouch kan ’t zeen det men te doon haet mit ein verbastering van ein hieël aw oetdrökking die men al vundj bie o.a. vader Jacob Cats oet 1635.

“Wiens hoofd van boter is
Die moet gedurig schromen
Die moet niet aan het vuur
Of aan de oven komen.”

 

 

 

Det is eine óngebeijde
(Ruw onbehouwen persoon, te weinig bewerkt, kan geen soepelheid betrachten.)
Het Limburgse woord “beije” beteikent get soepel, gezjwank, en sjterk make. Sjtele van gaffels, deesvlaegels, of de keuningsvogel van de sjötterie en neet te vergaete de “mispelaer” (wanjelsjtek).
De mispel is eine paerechtige sjtroek. ‘t Tej däörig hout gebroekde men veur ’t make van eine wanjelsjtek. Ieës wórt ’t greun hout gesjèld en den ein tiedje in de beerpöt gelag. Daonao koom d’r nog in de hits van de bakaove. Went de bakaove nao ’t bakke nog heit genóg woor, wórt de sjtek dao in gelag. Door de hits van (200° C) leet de bas los. Zoa kreeg de sjtek ein glaad aanzeen. Zoa eine sjtek woor den “gebeijd”.
Emes dae graof en ónbesjaaf is wurt nog ummer eine óngebeijde geneump.
Wól men de sjtek eine kersjtaanjelbroene kleuër gaeve den lag men dem nog ein tiedje in de pöt van de paerssjtal. Zoa kreeg men ein sjoan broen kkleuër. Daovanaaf kump ’t det dae sjtek eine “broens”geneump wórt. Eine sjoane mispelaer woor ein erfsjtök van vader op zoon.

Citaat oet “Zij reden bij nacht” van Bert Lindekens:
“Er waren in de dorpen knuppelgezelschappen, die er met stokken gewapend op uit gingen om te vechten. Op de kermis kwam het er vaak tot homerische vechtpartijen. In Oirsbeeck sloegen vier broers uit Schinnen zo geweldig met hun mispelhouten broens van zich af, dat de pastoor het dorp met klokgelui alarmeerde om de woestelingen te laten overweldigen.”

 

9 augustus 2016

“Zie haet häöre kroedwösj gekrege.”
( Zie is (eindelik) in verwachting).

 

20 juli 2016

“Hae haet doeve op de zölder”
Op broelofte waere witte doeve losgelaote. Ein broedspaar waat doeve en/of zjwalge zuut went zie oet de kirk kómme, of went die óm ’t hoes vlege op de broelofsdaag, zal väöl gelök in hoes kriege. Daovandaan duufkes op ein oetneuëdiging of op de broedskook.
Van eine souteneur zag men in de 17e ieëuw “Hij heeft duiven op zolder.”
“Duifje”woor al in de awdheid eine troetelnaam veur verleefde. Mer….men zag det ouch taege “veile meiskens.”
Veural de tortelduufkes höbbe beheuërlik naam gemaak op det terrein:
“De tortels zyn zoo dartel en zoo geil van aert, dat zy zelfs onnatuurlijke weelderigheden bedryven, wanneer zy mannen by mannen, vrouwen by vrouwen opgesloten zyn. De tortels munten uit in ’t werk der naejaeginge van wellust”.
De onkuisheid wurt nog ummer oetgebeeld es ein vrouw mit ein doef in de handj, zie zit op eine bók.
Doevepare blieve ein laeve lank bieein. De zörg veur ’t breujdsel wurt door man en vrouw gedeild. Zie sjtaon bekènd es productieve veurtplantjers. Daodoor is ein doef symbool van vruchbaarheid.
Mit ’t hart van ein doef is ’t meugelik ieëuwige leefde en troew van diene geleefde te kriege.
Dao wurt waal gezag det tortelduufkes kwebbelieërs zeen en “onkuis”. Mer es ’t vruike widvrouw is gewore zal zie zich noait mieë aan eine angere bènje.
Den heilige Basilius zag: “Volgt nu, o vrouwen, de tortelduif na en behoedt als zij het huwelijk.”

 

15 mei

Aan ein wiewatersvaetje en
ein kefeemaedje wurdt dèks gesop.
(dat is heel gewoon).

 

1 april 2016

Hae is dao in doortaoge wie ein aw sjmawtkroek
(Hij wèt dao väöl vanaaf).

Al vanaaf de 14e ieëuw wórt sjmawt (raapolie of koolzaadolie) gewónne oet keuëlzaod. Dae kosbare aolie wórt gebroek es lampe-aolie, in de ertesop en in de potage. Det is ein saort moos óngerein van erte, boane, reube, keuël en sjpek. Soms (goje vriedig) wórt ouch vèsj dao in gebakke.
De aolie wórt bewaard in ein sjmawtkroek (Keulse pot). Dae pot woor gans doortrog van de aolie.

 

3 februari 2016

„Jao en nei zag Sef“.
(Het is niet geheel duidelijk)

Sef koom op eine aovend aangesjaote heives.
„Höbs doe de sjuurpaort gesjlaote?“ vroog de vader.
Sef woor tamelik beneveld en nao lang dènke zag hae: „Jao en nei“.
„Waat is det veur zeiver kóns doe neet get dudelikker zeen?“ zag de vader.
„De groate paort is toe, mer de klein sjtuit nog aope“ woor ’t antjwoord.
Nog ummer zaet men went get neet dudelik is: „Jao en nei zag Sef“.